Plazhi i njohur Banje në Dubrovnik është përmbytur sërish nga tonelata mbeturinash të sjella nga deti, kryesisht nga drejtimi i Shqipërisë, duke rikthyer në vëmendje një problem të përsëritur prej vitesh që po tensionon marrëdhëniet mes dy vendeve. Mediat luksemburgase raportojnë se ky fenomen po i jep Kroacisë më shumë argumente për të rritur presionin ndaj Tiranës në kuadër të procesit të integrimit në Bashkimin Europian.
Të martën në mëngjes, banorët e lagjes Brezheviç u përballën me një skenë shqetësuese: plazhi Banje, një nga atraksionet më të njohura të Adriatikut dhe ikonë e qytetit ku janë xhiruar skena të serialit ‘Game of Thrones’, ishte mbuluar plot me mbeturina të ardhura nga deti. Pamja ishte e njëjtë edhe në portin e vjetër të Dubrovnikut, ku grumbullimet e mbetjeve të lundrueshme krijuan shqetësim të madh te banorët dhe bizneset lokale.
Një banor i zonës, i intervistuar nga mediat kroate, u shpreh se kjo situatë përsëritet çdo vit, kryesisht gjatë dimrit. Sipas tij, rrymat detare dhe kushtet e motit shtyjnë drejt Kroacisë sasi të mëdha mbeturinash që, sipas autoriteteve vendase, vijnë nga Shqipëria dhe vijojnë të jenë një problem i pazgjidhur.
Çështja është ngritur prej kohësh edhe në nivel europian. Shqipëria ka një nivel shumë të ulët riciklimi dhe përdor ende vendgrumbullime në qiell të hapur, ndërsa një pjesë e mbetjeve përfundon në lumenj që derdhen në Adriatik. Kjo përbën shqetësim të drejtpërdrejtë për vendet fqinje, të cilat e konsiderojnë këtë ndotje si rrezik mjedisor rajonal.
Kroacia po përdor këto argumente për të kërkuar më shumë angazhim nga Tirana dhe për të nxitur Brukselin të vendosë standarde më të rrepta mjedisore ndaj Shqipërisë në kuadër të procesit të integrimit. Sipas mediave të huaja, incidenti i fundit ka shtuar presionin diplomatik dhe ka rihapur debatin mbi masat që duhet të ndërmerren për të ndalur përhapjen e mbeturinave në Adriatik.
