Dhjetëra mijëra fëmijë të kequshqyer rrezikojnë të vdesin në zona të vështira për t’u arritur në rajonin Tigray të Etiopisë, të shkatërruar nga konfliktet, tani i goditur nga uria. Alarmi u ngrit të premten nga Kombet e Bashkuara.
“Pa qasje humanitare për të rritur përgjigjen tonë, rreth 30,000 fëmijë të kequshqyer rëndë në ato zona tepër të paarritshme janë në rrezik të lartë të vdekjes,” u tha zëdhënësi i UNICEF James Elder gazetarëve në Gjenevë. Komentet e tij erdhën pasi OKB të enjten tha se rreth 350,000 njerëz në Tigray po përballeshin me urinë, ndërsa dy milion njerëz më shumë ishin vetëm një hap larg nga ato kushte ekstreme.
“Tani ka uri në Tigray”, tha shefi humanitar i OKB Mark Loëcock, duke paralajmëruar se “çdo ekspert me të cilin do të flisni do t’ju tregojë se kjo do të përkeqësohet shumë”.
Loëcock tha se të dhënat e freskëta treguan se numri i njerëzve të klasifikuar si në gjendje urie ishte më i lartë se kudo në botë në çdo moment që prej kur një çerek milioni somalezë humbën jetën në vitin 2011″.
OKB ka thënë se më shumë se 90 përqind e më shumë se pesë milion njerëzve në rajonin Tigray kanë nevojë për ndihmë urgjente ushqimore dhe ka bërë thirrje urgjente për më shumë se 200 milion dollarë për të rritur përgjigjen e saj.
