Vrasja e 20-vjeçares Caroline, nga bashkëshorti i saj Babis Anagnostopulos, vijon të jetë tema kryesore në mediat greke dhe ato britanike. Pas një muaji piloti pranoi krimin e rëndë, ndërsa mister vazhdon të mbetet arsyeja që e shtyu të kryente krimin e rëndë. Pistat që po hetohen për këtë çështje janë disa. Ndërsa mediat helene shkruajnë se prindërit e 20-vjeçares dinë shumë më tepër për motivet e vërteta që e shtynë autorin të kryejë krimin e rëndë, por edhe për një “sekret” që Caroline mund të ketë ditur çka bëri që burri t’i merrte jetën.
Ndërkohë që “The Sun” në Britani zbulon detaje të reja nga momenti i arrestimit të Babisit, transportimit të tij nga Alonissos për në Athinë. “The Sun” duke iu referuar një burimi policor shkruan se vrasësi fillimisht u transportua me anije nga Alonissos në Skiathos dhe prej andej me aeroplan në Athinë.
Por përse nuk u transportua me helikopter nga Alonissos në Athinë? “Operacioni ishte planifikuar në detaje. Ne nuk donim ndonjë rrezik. Ne e dinim në këtë fazë që ai ishte i rrezikshëm, i aftë për gjithçka” tha ai.
Sipas raportit, “oficerët e policisë dyshohet se kanë refuzuar të transportojnë burrin pilot të Caroline me helikopterin e policisë sepse ishin të shqetësuar se ai mund të përpiqej ta rrëzonte atë në një përpjekje për vetëvrasje” shkruan “The Sun”. Babis Anagnostopulos është pas hekurave, ndërsa prindërit kërkojnë dënimin e tij përjetë.
