Vjedhja e 2 kasafortave nga 27-vjeçari Kristian Fusha, i cili u arresta nga policia pak ditë më parë është kthyer në tragjedi pasi e fejuara e tij Samanta Prelë Vitaj mësohet se ka vrarë veten. Dyshohet se e reja vetëm 17 vjeç ka helmuar veten me fotoksinë, pasi nuk e përballoi dot ngjarjen ku i fejuari vodhi motrën e saj. Gjithashtu mësohet se familja e Samanta Vitajt nga Malësi e madhe nuk ishte dakord me lidhjen e saj me 27-vjeçarin.
Këtë të martë Prokuroria e Tiranës vendosi masën arrest me burg për 27-vjeçarin nga Malësia e Madhe, i cili pasi vodhi kasafortat i la ato në Shkodër ndërsa ai me bashkëpunëtorin e tij u arratisën në drejtim të Malit të Zi.
Mësohet se Kristiani dhe Samanta kishin pak kohë që ishin fejuar dhe se 2 ditë para vjedhjes në shtëpinë e motrës së të ndjerës, çifti i ri kishin qenë për të ngrënë një darkë familjare të ftuar nga Eva Vitaj motra e Samantës. Kjo darkë duket se ka qenë pikënisja e planit të vjedhjes për Fushën, pasi aty ai ka mundur të sigurojë çelësat e shtëpisë së kunatës. Më pas vetëm 2 ditë pas darkës Kristiani sëbashku me shokun e tij shkoi për të vjedhur shtëpinë e kanatës, nga ku arriti të marrë 2 kasaforta në të cilat ndodheshin rreth 1 milionë lekë të vjetra.
Kamerat e sigurisë kanë arritur të filmojnë të gjithë skenën dhe nëpërmjet tyre është bërë indetifikimi i targave të makinës që ka çuar policinë në indetifikimin e pronares së makinës, e cila ka rezultuar se është nëna e bashkëpunëtorit të Fushës. Ndërkohë sipas pamjeve duket shoku i Fushës, i cili kishte shkuar i maskuar, por është indentifikuar pasi një moment e ka hequr maskën, ndërsa vetë Fusha kishte shkuar me paterica.
