Zbulohen përsëri detaje të reja nga vrasja e Eglantina Bucit para 8 vitesh në Malin me Gropa nga babai i saj Faik Buci dhe i vëllai Shkëlzen Buci, ngjarje e cila u zbardh plotësisht vetëm ditën e djeshme.
AbcNews ka zbuluar detaje të reja në lidhje me famijlen Buci dhe fatkeqësit e kësaj familjeje.Mësohet se disa vite më parë në këtë familje ka ndodhur një tjetër ngjarje e rëndë ku vjehrra ndryshe gjyshja e të resë kishte vrarë nusen e djalit.
Nëna e Faikut dhe gjyshja e Eglantinës para disa viteve ka vrarë nusen e djalit tjetër të familjes Buci, Bashkimit i cili ishte emigrant në Itali.
Sipas informacioneve të siguruara mësohet se ngjarja e rëndë ka ndodhur në orën 23:00 të mbrëmjes, në momentin që reja me vjehrrën po shikonin televizor dhe nisi konflikti, që përfundoi me vrasjen e bashkëshortes së Bashkimit.
Drama e familjes vijon dhe me një tjetër humbje të njerëzve të dashur, pasi dy vite më parë familjes se Faikut i kishte humbur jetën nga leucemia një nga djemtë.
Ndërkohë eshtrat e trupit të Eglantinës janë gjetur nga kafshet e egra rreth 2300 m lartësi në vitin 2017. Dhe ka qenë e ëma e vajzës, e ndarë nga Faiku, e cila ka pranuar pranuar të bëjë testin e ADN-së për të parë nëse kishte ngjashmëri me eshtrat e gjetura. Rezultati nuk ishte i papritur. Skeleti i copëtuar nga kafshët në Malin me Gropa, i përkiste Eglantina Bucit. Policia dhe Prokuroria vijuan edhe për tri vite hetimet derisa dokumentuan me prova se Shkëlzen Buci dhe Faik Buci, vranë vajzën e familjes, Eglantinën pasi nuk pranonin që ajo të vazhdonte lidhjen e saj.
Gjatë mbrëmjes së kaluar, janë thirrur në polici rreth 8 familjarë dhe të afërm të vajzës, të cilët janë pyetur nëse kanë pasur dijeni mbi ngjarjen e ndodhur më 2012-ën.
Por policia arrestoi vetëm Faik Bucin pas zbardhjes së ngjarjes. Ai akuzohet për vrasje për rrethana familjare, moskallëzimit të krimit, zhdukjes së kufomës e armbajtës pa leje. Ndërkohë vëllai i viktimës ndodhet në burg pasi po vuan dënimin me 13 vite heqje lirie për një vrasje të ndodhur në vitin 2017.
