Banorët e zonës së Komunës së Parisit në Tiranë kanë raportuar një situatë shqetësuese lidhur me ujin e ndotur që po del nga çezmat e tyre.
Sipas denoncimeve të shumta, uji ka ngjyrë të kuqe apo kafe dhe ka një erë të padurueshme, duke shkaktuar shqetësim në disa lagje të zonës.
Ky problem ka vazhduar për orë të tëra, pa asnjë njoftim zyrtar apo ndërhyrje nga autoritetet përkatëse.
Banorët kërkojnë urgjentisht ndërhyrje dhe një shpjegim të qartë nga institucionet përgjegjëse, duke theksuar rrezikun që kjo situatë mund të përbëjë për shëndetin publik.
Në përgjigje të denoncimeve të shumta, ditën e sotme Krimi Ekonomik ka nisur hetimet dhe ka ndërmarrë veprime, duke sekuestruar prova dhe nisur marrjen në pyetje të individëve të përfshirë.
Hetimet janë lidhur me punimet që ka realizuar UKT, pa njoftuar qytetarët paraprakisht për rrezikun e mundshëm të ndotjes së ujit.
Njoftimi:
Sot, më datë 11.04.2025, pas informacioneve të marra nga burime të hapura (rrjetet sociale) lidhur me një problematikë të ndotjes së ujit në disa zona të qytetit të Tiranës, nga Seksioni për Hetimin e Krimit Ekonomik dhe Financiar janë kryer veprime hetimore dhe procedurale për dokumentimin dhe sqarimin e rrethanave.
Në vijim të sa më sipër, është kryer këqyrja e vendit të ngjarjes, nga ku dyshohet se ka ndodhur çarja e tubacionit të nëndheshëm të ujit. Gjithashtu, i është marrë deklarim si person që ka dijeni shtetasit Dorjan Korbeci, me detyrë Drejtor i Departamentit të Prodhimit dhe Shpërndarjes, i cili ka sqaruar se, në rrugën “Shaban Karaj”, si pasojë e amortizimit, është dëmtuar linja e furnizimit me ujë, duke sjellë si pasojë furnizim me turbullira.
