Okultizmi lidhet me besimet dhe teoritë që mbrojnë ekzistencën e fenomeneve që nuk kanë ndonjë shpjegim racional ose shkencor, pra janë misterioz dhe të çuditshëm. Në vendin tonë janë regjistruar shumë vrasje për shkak të këtyre krimeve okulte.
Rasti më i bujshëm është ai i vdekjes së 23-vjeçares nga Delvina, Evgjeni Baxho. Të ndjerës pas ekspertizës së trupit të pajetë, iu konstatuan shenja okulte, të pashpjegueshme. Si kjo ngjarje janë regjistruar dhe shumë tragjedi të tjera në vendin tonë.
Për këtë ka reaguar Ministria e Brendshme, e cila është vënë në lëvizje dhe ka marrë masa për të parandaluar këtë fenomen. Pas një takimi konsultativ me përfaqësues të institucioneve shqiptare, akademisë, medias dhe shoqërisë civile për diskutimin mbi të ashtuquajturat “krime okulte”,
Ministria e Brendshme arriti në një përfundim, ndërsa mori masa parandaluese të cilat pritet të vihen në zbatim. Nën drejtimin e zv.ministrit të Brendshëm, Besfort Lamallari, përfaqësues nga Prokuroria e Përgjithshme dhe Policia e Shtetit, Komiteti i Kulteve, Qendra e Koordinimit Kombëtar kundër Ekstremizmit të Dhunshëm, Fakulteti i Drejtësisë,
Urdhri i Psikologut dhe mediat, diskutuan mbi këtë çështje me ndjeshmëri të lartë publike. Ndërkohë përfaqësuesit e organit të akuzës dhe agjencive të zbatimit të ligjit vunë në dukje mangësitë dhe nevojat për përmirësime ligjore me qëllim ndëshkimin nxitësve të këtyre veprave të rënda si dhe nevojën për njohuri më të thella mbi ritualet ezoterike, sidomos atyre organizimeve veprimtaria e të cilave mund të konsiderohet antikushtetuese dhe e rrezikshme në aspektin e sigurisë.
Sipas tyre është e domosdoshme të bëhen ndryshime në Kodin Penal.
