Kreu i Organizatës Botërore të Shëndetësisë (OBSH), Tedros Adhanom Gebreyesus, ka njoftuar ditën e sotme se vendet e varfra nuk po marrin vaksinën kundër Covid-19.
“Vendet e pasura i kanë marrë shumicën e porosive”-ka thënë Tedros gjatë një konference për mediat në Gjenevë. Më tej ai u bëri thirrje vendeve dhe prodhuesve të ndalnin bërjen e marrëveshjeve dypalëshe në kurriz të objektit të ndarjes së vaksinave COVAX, pasi kjo dëmton rëndë vendet e varfëra që nuk kanë mundësi në aksesimin e shpejtë të vaksinave.
Sipas tij një projekt i tillë ka për qëllim t’ju sigurojë njerëzve nga e gjithë bota pavarësisht pasurisë, vaksinën e duhur në luftën përballë Covid-19. Në fillim të kësaj jave OBSH-ja tha se struktura e COVAX kishte mbledhur 6 miliardë dollarë nga 7 miliardë dollarë që ajo ka kërkuar në 2021 për të ndihmuar financimin e dërgesave në 92 vende në zhvillim me mjete të kufizuara ose pa asnjë mjet për të blerë vaksina vetë.
Ndërkohë kujtojmë se deri më tani kombet më të pasura, përfshirë Britaninë, anëtarët e Bashkimit Evropian, Shtetet e Bashkuara, Zvicra dhe Izraeli kanë qenë në radhë të parë për radhët e dërgesave të vaksinave nga kompani duke përfshirë Pfizer dhe partnerin BioNTech, Moderna dhe AstraZeneca.
