Kreu i Komunitetit Mysliman të Shqipërisë, Bujar Spahiu ka reaguar pas protestës së sotme në Tiranë, kundër abuzimeve seksuale. Në rrjetet sociale, Spahiu shkruan se është i papranueshëm çdo abuzim ndaj gruas që është gjysma më e mirë e shoqërisë njerëzore. Ai e quajti rastin e abuzimit në Mirditë tronditës, ndërsa shprehet se përveç reagimit të shpejtë dhe shembullor nga organet kompetente, duhet edhe reagim nga mbarë shoqëria.
Postimi i plotë:
Është i papranueshëm çdo rast abuzimi ndaj gruas, gjysmës më të mirë të shoqërisë njerëzore.
Rasti më i fundit i abuzimit me të miturën në Mirditë është tronditës.
Përveç reagimit të organeve kompetente, që duhet të jetë reagim i shpejtë dhe shembullor , i atillë duhet të jetë edhe reagimi i mbarë shoqërisë.
Raste të tilla duhen dënuar pa mëdyshjen më të vogël nga secili prej nesh, e kemi detyrim të reagojmë ndaj së keqes në çdo formë që ajo shfaqet.
Ditën e sotme në Tiranë u protestua kundër abuzimeve seksuale ndaj grave dhe vajzave dhe u kërkua një reagim i institucioneve. Protesta pati një pjesëmarrje masive, ndërsa u mbajt në sheshin Skënderbej dhe gjithashtu te Drejtoria e Policisë. Rastet e abuzimit që kanë tronditur shoqërinë shqiptare kanë qenë të shumta, më i fundit ishte në Mirditë, ku një 15-vjeçare u përdhunua për disa muaj rresht në grup, pasi shantanzhohej me publikim videosh intime.
