Sa herë gjendet në vështirësi ose kur në vendin tonë gjërat nuk bëhen ashtu siç duhet, kryeministri Edi Rama ka gjithmonë një krahasim të cilit tashmë i ka dalë boja. “Shikoni ç’bëhet në Spanjë!” Herën e parë që e mori një shembull të tillë, ishte kur policia po ushtronte terror gjatë karantinës në muajt mars deri në qershor të vitit të kaluar në vendin tonë. Atëherë iu tregoi të gjithëve një video, ku policia spanjolle sillej në mënyrë edhe më brutale nga ç’sillet policia jonë me qytetarët. Ashti siç pritej, videoja ishte e pavërtetë, e marrë nga do protesta diku në Algjeri. Ashtu i turpëruar për shpërndarjen e lajmeve të rreme, Rama u detyrua të kërkonte ndjesë. Ndërkohë, rrjeti u mbusb me video të policisë spanjolle që këndonte me kitarë poshtë shtëpive të qytetarëve të izoluar.
Por fiksimi I Ramës me Spanjën nuk ndalet këtu. Sa herë gjërat nuk shkojnë mirë në vendin tonë, Spanja është etaloni i dështimit. Këtë herë ai ka postuar në instagram një video ku duket një autostradë (sipas kryeministrit në Spanjë), ku makinat janë të bllokuara nga bora. Nën video ai shkruan me ironi se Spanja duhet t’i kërkojë kripë PD-ës për shkrirjen e borës dhe nga LSI-ja për fall.
Në fakt, qeveria spanjolle deri më tani nuk e ka vendsour veten në pozitat e lypëses, siç e vendos veten me krenari kryeministri Rama. Në vend se ta mbajë si etalon të dështimit, Rama më mirë ta marrë Spanjën si shembullin e një qeverie vërtet të majtë që ka rritur pagat, ka nxjerrë ligj për dhunën me bazë gjinore, ka taksuar të pasurit për të mbuluar dëmin ekonomik të pandemisë. Ndërkohë, Rama dhe ministrat e tij bëjnë shfaqje në rrjetet sociale dhe hanë darka me oligarkët në restorantet më të shtrenjta. Nëse bëni një kërkim të thjeshtë në Google, nuk del asnjë rezultat për Spanjën të bllokuar nga bora, por edhe nëse është, kjo nuk e justifikon dështimin e Ramës me menaxhimin e çdo situate të mundshme që rrezikon qytetarët.
