Kostoja e votimit të emigrantëve do të jetë 22 deri në 25 dollarë , sipas KQZ-së. Grupi i punës në KQZ, i caktuar për të vlerësuar mënyrën e votimit të diasporës në 25 prill 2021, nuk ka përllogaritur dot sa do të kushtojë ky proces, por parimisht, thotë se vota e një shqiptari jashtë vendit mund të kushtojë, nga 22-25 dollarë. Sipas grupit të KQZ-së vlerësohet si problem “kostoja financiare më e lartë për votuesit, pasi posta drejt Shqipërisë është më e kushtueshme”
Metoda e votimit, si në Kosovë
Duke marrë në konsideratë kushtet e Shqipërisë (shtrirjen gjeografike të Diasporës, afatet kohore në dispozicion, shërbimi postar, mungesën e sistemeve të zhvilluara teknologjike, vlerëson se më i përshtatshëm për tu zbatuar aktualisht në vendin tonë, është metoda e votimit nga jashtë përmes postës dhe shkarkimit i fletës së votimit online në faqen e KQZ-së. Grupi i Punës vlerëson këtë metodë votimi (modeli i Kosovës), si në zgjidhje afat-shkurtër.
Ideja e votës nëpër ambasada është hedhur poshtë nga grupi i punës dhe kjo për shkak të numrit të kufizuar të selive diplomatike të Shqipërisë. Ndërsa votimi online konsiderohet i pasigurtë dhe për këtë arsye është përjashtuar dhe ky opsion.
Deklarimi online i adresës dhe kërkesa në KQZ
Që t’u ofrohet mundësia të votojnë, emigrantët duhet të deklarojnë në e-Albania adresën që kanë jashtë shtetit, jo më vonë se 60 ditë para zgjedhjeve. Kjo do të shënohet në Gjendjen Civile krahas adresës që kanë në Shqipëri. Grupi i punës i KQZ-së nisur nga kjo thotë se shqiptarët jashtë vendit duhet të hyjnë më pas në portalin e KQZ dhe të dërgojë një kërkesë ku të shfaqë interesin të votojë. Administrata e komisionit bën verifikime dhe e njofton qytetarin jashtë vendit nëse e drejta e tij për të votuar është pranuar.
Në këtë rast, ata grupohen në një regjistër të posaçëm, dhe emri i tyre hiqet nga lista e zgjedhësve në Shqipëri. Fletën e votimit, zgjedhësi jashtë vendit e shkarkon online nga faqja e KQZ-së, dhe pasi e plotëson, e dërgon përmes postës në Shqipëri.
Emigrantëve iu kërkohet të deklarojnë edhe anëtarët e familjes, me të cilët ndodhet në adresë, kështu që adresa përditësohet për të gjithë anëtarët e familjes së tij, gjithmonë për ata që ka në certifikatën familjare. Ka edhe një seksion me “shënime” dhe në fund, gjë që është shumë e rëndësishme, – duhet të ngarkojë një foto, të një dokumenti, që vërteton adresën, që mund të jetë, psh., fatura e dritave, e ujit ose një kontratë qiraje.
Rreziqet e manipulimit
Që të hyjnë në e-albania duhet një kartë ID e vlefshme. Mirëpo shumë emigrantë nuk e disponojnë këtë dokument, ose ju skadon deri në fund të vitit.
Një problem tjetër është vonesa e mundshme. Sipas grupit të KQZ-së “Nuk ka siguria që fleta e votimit pas plotësimit nga zgjedhësi arrin në Shqipëri në kohë”. Një tjetër problem është konstatuar “Mungesa e sigurisë përgjatë rrugës ose para numërimit / mbërritjes në KQZ”. Ndërkohë, evidentohet si mundësi potenciale “Rreziku i shtimit fiktiv të fletëve të votimit”.
/GazetaReforma.com/
