Sot ka nisur zyrtarisht fushata për zgjedhjet parlamentare të 9 shkurtit në Kosovë. Këto zgjedhje sjellin disa risi, ndër të cilat është edhe ndryshimi i rregullave për heshtjen zgjedhore, e cila nuk do të fillojë më para ditës së zgjedhjeve.
Heshtja zgjedhore do të nisë një minutë para hapjes së qendrave të votimit në orën 7:00 dhe do të zgjasë deri në mbylljen e tyre në orën 19:00.
Në këto zgjedhje do të marrin pjesë 28 parti politike dhe 1280 kandidatë për deputetë.
Ndryshe nga zgjedhjet e mëparshme, votuesit këtë herë mund të zgjedhin deri në 10 kandidatë për deputetë, krahas votimit për një parti politike.
Në listën e votuesve figurojnë 2,075,868 qytetarë brenda dhe jashtë vendit.
Nga këta, 104,924 votues që jetojnë jashtë Kosovës mund të votojnë përmes postës ose në mënyrë fizike në 17 ambasada dhe 15 konsullata të Kosovës në 19 shtete.
Votimi me postë ka filluar më 9 janar dhe do të zgjasë deri më 8 shkurt, ndërsa në përfaqësitë diplomatike të regjistruarit mund të votojnë më 8 shkurt.
