Një situatë kritike paraqitet në Kosovë, Ndërsa numri i të infektuarve me coronavirus po pëson rritje të përditshme, kapaciteti i spitaleve po shkon drejt fundit.
Drejtori i Klinikës Infektive dhe infektologu, Izet Sadiku e konfirmon së spitalet po shkojnë drejt kolapsit, pasi vetëm dy javët e fundit numri është rritur me 300.
“Kemi pasur një rritje në të dyja javët e fundit. Në fillim të marsit kemi pasur rreth 500 pacientë të hospitalizuar. Për dy javë numri u rrit me 800 qytetarë. Kjo tregon se kapacitetet spitalore janë duke u mbushur. Që pesë muaj Klinika Infektive nuk ka kapacitete, pra i ka të mbushura gjithmonë”, tha Sadiku.
Kujtojmë se vetëm dje në Kosovë u konfirmuan 709 raste të reja dhe 8 persona kanë ndërruar jetë. Këto shifra janë alarmante për një shtet të vogël me rreth 2 milionë banorë.
Nëse iu referohemi shifrave nga fillimi i pandemisë, janë të infektuar rreth 77 mijë e 827 banorë. COVID-19 prej atëherë e deri tani mori jetën e 1 mijë e 715 personave, në mesin e tyre edhe një 16 vjeçar nga Komuna e Vitisë.
Sipas raportit ditor të Institutit Kombëtar të Shëndetësisë Publike të Kosovës (IKShPK), aktualisht në vend janë 11 mijë e 58 raste pozitive me COVID-19.
Ajo që duhet theksuar është dhe mungesa e vaksinave. Ndërkohë që Kosova po përballet me një valë të re infektimesh, që mesa duket është më e fortë se të parat, nuk ka mundësi menaxhimi dhe vaksinimi.
Vonesat në negociata, mostransparenca si dhe gjendja politike në Kosovë, vlerësohet se kanë ndikuar në mossigurimin e vaksinave kundër koronavirusit në Kosovë, në kohën kur pothuajse të gjitha shtetet në rajon kanë filluar vaksinimin.
