Agjencia e Ushqimit dhe Veterinarisë e Kosovës ka njoftuar se po monitoron situatën lidhur me ngarkesat e mandarinave që vijnë nga Shqipëria, pas shqetësimeve të ngritura nga Sistemi Evropian i Sigurisë Ushqimore (RASFF) për praninë e pesticideve mbi nivelet e lejuara në këtë frut.
Sipas AUV-së, masat e kontrollit janë rritur dhe janë marrë mostra për testim për të përcaktuar nëse mandarinat përmbajnë pesticide mbi nivelet e lejuara.
Ky kontroll shtesë bëhet si pasojë e dyshimeve të ngritura nga RASFF, për të eliminuar çdo mundësi rreziku për shëndetin e konsumatorëve. Deri tani, nuk ka pasur asnjë raport shqetësues për këto produkte.
Kosova është në kontakt me autoritetet shqiptare për shkëmbimin e informacionit mbi çdo zhvillim të mundshëm në lidhje me produktet. Në javët e fundit, disa shtete evropiane, si Italia, Kroacia dhe Republika Çeke, kanë kthyer ngarkesat me mandarina nga Shqipëria për shkak të problemeve me përmbajtjen e pesticideve.
