Turizmi ishte sektori që u “infektua” më keq dhe për pak sa nuk kolapsoi nga pandemia e koronavirusit në Shqipëri, por ‘anti-virali’ edhe për këtë sezon duket se ishin pushuesit kosovarë.
Këta të fundit shpëtuan nga kriza totale sektorin e turizmit në Shqipëri, sidomos gjatë dy muajve të vetës Korrik-Gusht, ku ardhjet nga Kosova stabilizuan disi financiarisht dhe i dhanë frymëmarrje operatorëve turistik.
Ishin pikërisht operatorët turistikë shqiptarë që të nxitur edhe nga premtimet e ministrit të Turizmit, Blendi Klosi, se gjoja këtë vit “do të ishin shqiptarët në vend që do të shkaktonin një ‘boom’ shpenzimesh turistike në Shqipëri”, për pak sa nuk mbetën me “gisht në gojë”.
Shqiptarët të trembur ca nga pandemia dhe karantina e zgjatur, ca edhe nga mungesa e pushimeve, vendosën që të mos shpenzojnë ose të harxhojnë fare pak para për pushime fundjave më së shumti në bregdet.
Kjo gjë detyroi shumë operatorë turistikë që në muajt Maj-Qershor të mos e ndjenin thuajse fare nisjen e sezonit. Po ashtu shumë prej operatorëve turistikë, ulën qepenat e aktiviteteve të tyre, nisën stafet për në shtëpi, dhe lanë shumë familje pa punë dhe të ardhura.
Por ishin pikërisht ardhjet nga Kosova dhe Maqedonia e Veriut, që bënë që operatorët turistik në Shqipëri të arrinin të punonin sado pak në dy muajt e fundit të verës.
‘Ndihma’ nga Kosova
Shifrat zyrtare të lëvizjes së shtetasve tregojnë se 62% e të totalit të hyrjeve në vendin tonë, në muajin gusht, ishin nga Kosova.
Sipas INSTAT, në gusht 2020, hynë në vendin tonë mbi 356 mijë shtetas nga Kosova, nga 575 mijë në total. Ndërkohë që një vit më parë, nga Kosova, vetëm në gusht hynë mbi 781 mijë shtetas dhe që përbënin 51.1% të totalit të shtetasve që kishin hyrë në gusht 2019 në vendin tonë.
Sa i takon bilancit 8-mujor, shtetasit nga Kosova, përbëjnë 49.2% të hyrjeve në vend, ndërkohë që një vit më parë përbënin 37.7% të totalit të hyrjeve në janar-gusht 2019.
Shifrat e INSTAT
Pandemia krijoi në vend një rënie drastike të hyrjeve, në raport me një vit më parë. INSTAT raportoi se, hyrjet e shtetasve shqiptarë dhe të huaj në territorin shqiptar, në muajin gusht 2020, janë 846.973. Krahasuar me gushtin 2019, ky tregues rezulton me rënie 62,5%.
Në gusht 2020, hyrjet e shtetasve të huaj në territorin shqiptar ishin 575.559. Krahasuar me gushtin 2019, ku ky numër shënoi rënie me 63,0%.
Numri i shtetasve të huaj që hynë në Shqipëri në 8-mujorin 2020 ishte 1.745.169, duke rënë me 64,2%, në krahasim me të njëjtën periudhë të vitit 2019.
Gjatë tetë muajve të 2020-s, Kosova kishte rënien më të ulët të hyrjeve të shtetasve në Shqipëri me 53,2%.
Sipas INSTAT, daljet e shtetasve shqiptarë dhe të huaj nga territori shqiptar, gjatë muajit gusht 2020, ishin 846.714 individë, duke shënuar një rënie me 60,8%, krahasuar me të njëjtën periudhë të një viti më parë.
“Daljet e shtetasve shqiptarë nga territori i Shqipërisë në muajin gusht 2020 ishin 310.593. Krahasuar me gushtin 2019, ky numër ka rënë 57,2%.
Daljet e shtetasve të huaj nga territori i Shqipërisë gjatë muajit gusht 2020, janë 536.121. Krahasuar me gushtin 2019, ky numër ka rënë 62,6%. Numri i shtetasve shqiptarë të dalë nga Shqipëria në 8-mujorin 2020, ishte 1.937.235 duke rënë 50,3%, krahasuar me të njëjtën periudhë të një viti më parë”,- raporton INSTAT.
/Burimi: INSTAT/ GazetaReforma.com/
