Kosova ka hequr një sërë masash kufizuese të pandemisë Covid-19, përfshirë këtu edhe orën policore. Në mbledhen e sotme të qeverisë u vendos që orari i kufizimit të hiqet, megjithatë nga mesnata e deri në orën 05:00 të mëngjesit nuk do lejohet grumbullimi i më shumë se 10 personave qoftë në ambiente të hapura, qoftë në ambiente të tjera, veçse në familje. Gjithashtu u mor vendimi që të zgjatet orari i punës për shërbimet e gastronomisë deri në orën 23:00. Ndër të tjera, u vendos heqja e maskave në ambiente të jashtme.
“Kufizimi i orarit të qarkullimit do të hiqet, megjithatë nga ora 00:00, e deri në ora 05:00 nuk lejohet grumbullimi i më shumë se 10 personave qoftë në ambient të hapur ose të tjera, përveç ambienteve me familje. Zgjatja e orarit të punës për shërbimet e gastronomisë deri në ora 23:00. Lejimi i lëvizjes pa maska gjatë ecjes kur ata janë vetëm dhe në ambient të jashtëm”, tha ministri i Shëndetësisë, Arben Vitia në mbledhjen e sotme.
Ditët e fundit rastet me Covid-19 në Kosovë, kanë ardhur në rënie. Sot janë raportuar vetëm 18 raste të reja pozitive dhe nuk është shënuar asnjë viktimë nga virusi. Që nga fillimi i pandemisë në Kosovë janë regjistruar 107.354 raste pozitive, ndërsa 2.242 persona kanë humbur jetën.
