PRISHTINË
Deri tani, numri i personave të infektuar me koronavirus në Kosovë ka arritur në 10 mijë e 795, ku prej tyre 365 kanë humbur jetën, kurse 6 mijë e 411 janë shëruar.
Duke qenë me të tilla shifra, Kosova renditet e para në botë për nga numri i vdekjeve në raport me popullatën.
Themeluesi dhe Drejtori i Institutit për Hulumtime “Scripps”, Eric Topol, disa ditë më parë ka publikuar në llogarinë e tij në rrjetet sociale listën e shteteve me numër vdekjesh më tepër se në 1 milionë banorë, pra në raport me popullatën.
Kosova rezulton e para në listë, duke lënë pas edhe Amerikën, që në raport me popullsinë, është e nënta në glob të numrit të personave të prekur me Covid-19.
Lidhur me këto statistika ka reaguar deputetja e LVV-së, Mimoza Kusari-Lila.
Kusari Lila ka hedhur akuza në drejtim të LDK-së, e cila ka edhe ministrin e vet në Ministrinë e Shëndetësisë, duke thënë se nuk po menaxhon siç duhet pandeminë.
“Kaq për menaxhimin e mirë të Armend Zemaj nga LDK dhe lavdërimin e Isa Mustafës për punën e kryer nga jurisiti, Ministër i shëndetësisë. Ironikisht, duket se Isa Mustafa po lexon mbrapsht “suksesin” e Kosovës. Kush është “xhelati i vërtetë” po tregojnë statistikat”, ka shkruar Kusari-Lila.
Kosova është ndër shtetet që raporton numër të lartë të vdekjeve nga virusi. Prej disa javësh, në Kosovë raportohen për mbi 10 viktima në 24 orë.
Shifrat zyrtare në Kosovë flasin për 4 mijë e 19 njerëz të infektuar me Covid-19.
