Dy zyrtarë të Ministrisë së Punëve të Brendshme të Serbisë janë dëbuar nga territori i Kosovës të shtunën në mbrëmje, vetëm pak orë pas arrestimit të tyre nën dyshimin për veprime që cenojnë sigurinë kombëtare.
Lajmi u konfirmua nga avokatët mbrojtës të tyre për Radion Evropa e Lirë.
Nikolla Vujoviç dhe Mlladen Millojeviç, të cilët sipas autoriteteve kosovare kishin hyrë ilegalisht në vend, janë shpallur persona non grata dhe u është ndaluar hyrja në Kosovë për pesë vitet e ardhshme.
Avokatët Bogdan Laziç dhe Srgjan Mitroviç bënë të ditur se klientët e tyre janë dërguar jashtë kufirit të Kosovës me një vendim të menjëhershëm të autoriteteve.
Të dy ishin në mesin e një grupi prej katër personash, tre zyrtarë në detyrë dhe një i pensionuar të lidhur me MPB-në e Serbisë, të arrestuar në ditën e shtunë në Kosovë.
Megjithatë, autoritetet kosovare kanë konfirmuar zyrtarisht vetëm arrestimin e Vujoviçit dhe kanë bërë të ditur se për të ishte marrë vendimi për heqjen e shtetësisë kosovare.
Ministri i Brendshëm në detyrë, Xhelal Sveçla, deklaroi se Vujoviç ishte i rekrutuar nga strukturat e inteligjencës dhe sigurisë së Serbisë, dhe se prania e tij përbënte rrezik për rendin dhe sigurinë në Kosovë.
Në këtë bazë, sipas Sveçlës, u mor vendimi për largimin e tij nga territori i Republikës së Kosovës.
