Komiteti Ekonomik dhe Social Evropian (EESC) është bërë institucioni i parë i Bashkimit Evropian që ka pranuar anëtarë nga Kosova, duke shënuar një hap të rëndësishëm drejt afrimit të saj me strukturat evropiane.
Në një njoftim zyrtar, ky institucion këshilldhënës i BE-së ka ftuar organizatat e shoqërisë civile në Kosovë të aplikojnë për anëtarësim deri më 24 tetor, në kuadër të Nismës së shteteve kandidate për zgjerim, e cila u iniciua në vitin 2023.
“Me këtë nismë shpresojmë të fuqizojmë projektet që nxisin dialogun civil dhe social, duke forcuar angazhimin dhe bashkëpunimin brenda komuniteteve kosovare”, thuhet në thirrjen e publikuar nga Komiteti.
Në shkurt të vitit 2024, EESC pranoi për herë të parë anëtarë nga vendet kandidate për anëtarësim në BE, përfshirë Shqipërinë, Bosnje e Hercegovinën, Gjeorgjinë, Malin e Zi, Maqedoninë e Veriut, Moldavinë, Serbinë, Turqinë dhe Ukrainën. Në atë kohë, Kosova nuk u përfshi pasi nuk gëzon ende statusin zyrtar të vendit kandidat.
Vendimi i ri i Komitetit shënon një hap simbolik, pasi pavarësisht mungesës së këtij statusi, është vendosur që “të hapet faza e dytë e nismës edhe për Kosovën si kandidate potenciale për anëtarësim në Bashkimin Evropian”.
Ky zhvillim vlerësohet si një sinjal politik i rëndësishëm për përfshirjen graduale të Kosovës në proceset integruese evropiane dhe për forcimin e bashkëpunimit të saj me institucionet e BE-së.
