Edhe shtypi i shkruar i është bashkuar masave për parandalimin e përhapjes së koronavirusit.
Mësohet se gazetat “Panorama” dhe “Panorama Sport”, do të ndalojnë përkohësisht botimin.
Në një njoftim në web, “Panorama” shkruan, se nuk do të ishte e arsyeshme që t’u kërkonte lexuesve, që të dilnin nga shtëpia për të blerë gazetën.
Ndërprerja e botimeve do të jetë në fuqi, deri në mbarimin e gjendjes së jashtëzakonshme.
Njëkohësisht do të ndërpresë botimet në print edhe “Gazeta Shqiptare”, e cila do të operojë vetëm në versionin online.
Shqipëria që prej ditës së hënë po përballet me koronavirusin, ku deri më tani janë regjistruar 33 të infektuar edhe një viktimë.
Qeveria ndërkohë ka marrë një sërë masash shtrënguese, për të parandaluar përhapjen e koronavirusit.
Në rrugët e vendit ushtria dhe policia po kryejnë kontrolle, për personat që thyejnë rregullat e karantinimit.
Gjithashtu janë mbyllur shkollat, lokalet, fasoneritë, si dhe janë ndaluar tubimet.
