Korça u kthye mbrëmjen e së premtes në kryeqendrën kulturore të Ballkanit, teksa hapi siparin e edicionit të 7-të të festivalit ndërkombëtar “Shpirti i Ballkanit”.
Eventi nisi me një paradë shumëngjyrëshe në rrugët e qytetit, ku artistë nga Shqipëria, Kosova, Maqedonia e Veriut, Greqia, Mali i Zi, Bullgaria dhe Franca sollën kulturën e tyre përmes këngës, valles dhe kostumeve tradicionale.
Ky edicion sjell për herë të parë edhe pjesëmarrjen e bandave muzikore krahas ansambleve popullore, duke shtuar diversitetin dhe dinamizmin artistik.
“Është hera e parë që vijmë në Shqipëri dhe jemi të lumtur që përfaqësojmë zonën tonë me kërcime tradicionale”, thanë disa prej pjesëmarrësve, ndërsa të tjerë shprehën entuziazmin për mikpritjen: “Korça është një qytet mikpritës, me njerëz të mrekullueshëm dhe një atmosferë e paharrueshme”.
Mbrëmja kulmoi në Pazarin e Vjetër, i cili u shndërrua në një skenë të hapur nën tingujt e muzikës folk dhe jazz.
Qindra qytetarë dhe vizitorë nga rajoni festuan mes ritmeve dhe energjisë së traditës, duke e kthyer festivalin në një festë të vërtetë të identitetit ballkanik.
