Pas akuzave nga ish numri dy i qeverisë, Arben Ahmetaj se është koordinator i grupeve kriminale për interes të kryeministri Edi Rama, ka ardhur dhe reagimi i parë nga Ergys Agasi.
I kontaktuar nga gazetari Ylli Rakipi për një intervistë në emisionin “Të Paekspozuarit”, Agasi dha një përgjigje të shkurtër. Ai deklaroi “nuk merrem me thashetheme, sidomos nga njerëz që janë arratisur dhe kanë probleme me drejtësinë”.
Një qëndrim të ngjashëm ka mbajtur dhe vetë kryeministri Edi Rama, ku gjatë intervistës me gazetarin Giorgio Mottola i konsideroi akuzat e ngritura thashetheme, që janë eksportuar në Itali nga mediat shqiptare.
Agasi shtoi gjithashtu se nuk ka asnjë funksion në Partinë Socialiste, dhe nuk mban asnjë post në qytetin e Durrësit, ku ushtron veprimtarinë e tij si biznesmen.
Në dokumentarin e dytë të Rai 3 për marrëveshjen mes Italisë dhe Shqipërisë për refugjatët, ku Shqipëria u paraqit si një narko-shtet, u shfaq edhe një intervistë e gazetarit Giorgio Mottola me ish zv.kryeministrin Arben Ahmetaj, tashmë i arratisur në Zvicër.
Ky i fundit hodhi akuza të rënda për Edi Ramën, duke thënë se ai jo vetëm ka lidhje me krimin, por ka pritur në zyrë edhe bosët e mafias. Ahmetaj pretendon se i ka parë këta persona, por pasi u pyet nga gazetari se cilët janë, nuk dha emra, duke përmendur vetëm disa qytete nga ku ai pretendon se vijnë, konkretisht Elbasani, Durrësi dhe Dibra.
