Policia Kufitare në Portin e Durrësit ka finalizuar me sukses një operacion kundër kontrabandës, duke ndaluar një shtetas që tentonte të transportonte mallra akcize pa deklarim doganor.
I arrestuari është shtetasi me inicialet R. S., 28 vjeç, banues në Kukës, i cili u kap në flagrancë në dalje të territorit të Shqipërisë. Gjatë kontrollit të imtësishëm të furgonit të tij, shërbimet e policisë zbuluan 177 steka me cigare të fshehura, të destinuara për t’u kontrabanduar jashtë vendit.
Mallrat e paligjshme, së bashku me mjetin e transportit, janë sekuestruar në cilësinë e provës materiale. Ndaj 28-vjeçarit është ngritur akuza për veprën penale “Kontrabandë me mallra për të cilat paguhet akcizë”, dhe aktualisht po merret në pyetje për të zbardhur rrethanat e plota të rastit.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.
