Dy të rinj janë konfliktuar për motive të dobëta në Bilisht të Korçës. Për pak konflikti, sa nuk ka përfunduar në humbje jetësh.
Një 25-vjeçar ka qëlluar me automatik një 20-vjeçar, pasi ishin konfliktuar me njëri-tjetrin. Në sher e sipër 25-vjeçari ka qëlluar me automatik në drejtim të 20-vjeçarit K. B.
I riu nuk ka mbetur i lënduar për fat të mirë, ndërsa autori i ngjarjes është larguar me automjetin e tij në drejtim të paditur.
Njoftimi i policisë
Specialistët e Seksionit për Hetimin e Krimeve në Komisariatin e Policisë Devoll, referuan materialet pranë Prokurorisë si edhe bënë shpalljen në kërkim të shtetasit:
R.F, 25 vjeç, banues në Bilisht.
Mbrëmjen e djeshme, në qytetin e Bilishtit, shtetasi i mësipërm pas një konflikti të çastit për motive të dobëta, dyshohet se ka qëlluar me armë zjarri tip automatik, në drejtim të shtetasit K.B, 20 vjeç, banues në Bilisht, por pa i shkaktuar dëmtime këtij të fundit dhe më pas është larguar me shpejtësi me automjetin e tij.
Gjatë kontrollit të ushtruar në vendin e ngjarjes u gjetën dhe sekuestruan në cilësinë e provës materiale dy gëzhoja dhe një copë fishek luftarak.
Nga ana e Policisë po punohet për kapjen e shtetasit R.F, i dyshuar si autor i kësaj ngjarje.
Materialet i kaluan Prokurorisë pranë Gjykatës së Shkallës së Parë Korçë për veprat penale “Vrasja me dashje, mbetur në tentativë”, “Mbajtja pa leje dhe prodhimi i armëve, armëve shpërthyese dhe i municionit”
