Gjyqtarja e Posaçme, Irena Gjoka, ka dhënë dorëheqjen nga shqyrtimi i çështjes “Toyota Auris”, ku të pandehur janë ish-kryeprokurori i Vlorës, Aurel Zarka, ish-oficerja gjyqësore Erjona Daupaj, avokati Radovan Çela dhe Astrit Vladi.
Dorëheqja e saj lidhet me një konflikt interesi, pasi më herët ka shqyrtuar çështjen e sekuestrimit të pasurive të Suel Çelës, kreut të një organizate kriminale, akuza që lidhet edhe me këtë dosje.
Komunikimet e të pandehurve në aplikacionin SkyEcc kanë zbuluar diskutime mbi mënyrat e ndikimit në sistemin e drejtësisë për të liruar pasuritë e Çelës nga sekuestro.
Gjyqtarja vlerësoi se, për shkak të këtyre rrethanave, mund të jetë në pozitën e një dëshmitareje në proces.
Pas dorëheqjes së saj, shorti elektronik caktoi gjyqtarin Erjon Çela për shqyrtimin e çështjes.
Dosja “Toyota Auris” ka marrë emrin nga dy makinat që vinin nga Belgjika, ku u zbuluan 3.4 milionë euro të fshehura.
Pavarësisht një procesi të gjatë, për trafikimin e parave që dyshohet se rridhnin nga aktiviteti kriminal i trafikut të drogës, u dënua vetëm një nga kushërinjtë Vladi, ndërsa shumica e parave vijojnë të jenë të sekuestruara.
