Drejtoresha e Inspektoriatit Shtetëror Shëndetësor (ISHSH), Vjollca Braho ka rezultuar e prekur me koronavirus, ndërkohë që prej disa ditësh ka pasur nevojë për trajtim spitalor pasi prej 10 ditësh kishte simptomat e virusit.
Ditën e sotme Braho është transferuar te Sanatoriumi, spital ky i shndërruar në një spital COVID-2 për shkak të rritjes së infeksioneve me koronavirus përgjatë ditëve të fundit.
Burime për FaxNews bëjnë me dije se një prej shkaqeve që Braho është transferuar në Sanatorium, është fakti se Covid 19 i ka dëmtuar asaj mushkëritë, dhe ky spital është i specializuar pikërisht në këtë fushë.Të njëjtat burime bëjnë me dije se Brahos, simptomat i kanë nisur para rreth 10 ditësh, ndërkohë që për momentin gjendja e saj është e stabilizuar, edhe pse ndodhet në repartin e terapisë intesive, dhe po mbahet nën kujdes të shtuar shëndetësor.
Drejtoresha e ISHSH-së ka rezultuar pozitive me Covid pas ekzaminimit me skaner, ndërkohë që tamponi i ka dalë fillimisht negativ, gjë që është theksuar dhe nga drejtuesi i urgjencës kombëtare Skënder Brataj. Jo gjithnjë tamponi jep një rezultat real, pasi marshi i tij i gabimit është i lartë, diku të 30%.
Vjollca Braho ka qenë pjesë e grupeve të kontrollit në terren, dhe prej fillimit të pandemisë, më shumë se 4 muaj më parë, ajo ka udhëhequr respektimin e masave kundër Covid në të gjitha institucionet publike dhe biznese. Prej kohës kur ka rezultuar pozitive me Covid 19, ajo është izoluar, ndërkohë që janë marrë të dhëna për kontaktet e saj të afërta, dhe u janë bërë atyre testimet e nevojshme.
Kujtojmë se sot është shënuar një bilanc i rëndë i viktimave nga Covid-19 brenda 24 orëve të fundit në vendin tonë. 4 viktima mes të cilave dhe një 21-vjeçare e cila është viktima më e re nga koronavirusi në vend.Nga të dhënat e Ministrisë së Shëndetësisë moshat e viktimave kanë qenë 23, 49, 56 dhe 67 vjeç. Ndërkohë, janë shënuar 85 raste të reja me Covid-19 brenda 24 orëve në vendit tonë dhe 88 të shtruar në spitalin infektiv.
