Komisioneri për Zgjerimin në BE, Oliver Varhelyi, ka komentuar Konferencën e Donatorëve që u zhvillua ditën e djeshme në Bruksel, ku u mblodhën 1.15 miliardë euro.
Duke folur për “Deutsche Welle”, Komisioneri tha se vendet e Bashkimit Europian treguan angazhimin e tyre për të mbështetur Shqipërinë.
Më tej ai shton, se po punohet me qeverinë shqiptare, që paratë të përdoren në mënyrë të arsyeshme dhe Shqipëria të aftësohet në përballimin e tërmeteve.
Përsa i përket rrezikut nga korrupsioni, Varhelyi tha, se BE do të jetë shumë e përfshirë në implementimin e fondeve dhe të gjitha partimet do të respektohen.
Në lidhje me anëtarësimin, Komisioneri u shpreh, se ka shumë punë para, por Shqipëria është e angazhuar që të arrijë rezultate.
Intervista
Cili është vlerësimi juaj tani në fund të konferencës, ku u mblodhën 1,15 miliardë euro për Shqipërinë?
Oliver Varhelyi: Jam shumë i kënaqur! Ishte shumë pozitive, njerëzit erdhën këtu për të shprehur solidaritet me Shqipërinë, unë e shoh këtë si një angazhim të madh jo vetëm nga Europa, por edhe globalisht. Jam shumë i gëzuar të shoh se sa të angazhuar janë vendet e Bashkimit Europian për të mbështetur Shqipërinë dhe sa frymë pozitive ka për Shqipërinë.
Cili do të jetë roli i BE-së në menaxhimin e fondeve të mbledhura?
Sigurisht implementimi do të jetë çelësi, parimet, për të cilët kemi rënë dakord me Bankën Botërore dhe me institucionet e tjera financiare duhet të respektohen. Kemi vendosur marrëdhënje të mira pune me qeverinë e Shqipërisë deri më tani, e do të sigurojmë që paratë të përdoren arsyeshëm. Do punojmë edhe që të aftësohet Shqipëria për përballimin e tërmeteve në të ardhmen. Tani na duhet t’i investojmë me mençuri tani këto para. E do t’i ndihmojmë Shqipërisë ta bëjë këtë.
Si do mund të mënjanohet rreziku i korrupsionit?
Korrupsion nuk do të ketë dhe nuk do të tolerohet. Ne do të jemi të përfshirë në implementimin dhe është shumë e qartë se ku janë nevojat më të mëdha, në sektorin e strehimit dhe ndërtesat publike. Aty do të fokusohemi edhe ne. Dhe sigurisht, që nëse do mundemi t’i modernizojmë këto rajone në Shqipëri, do ta bëjmë këtë. Por siç thashë, ne do të jemi shumë të përfshirë në implementimin e fondeve dhe do të sigurojmë që të gjitha parimet dhe rregullat tona të respektohen.
Duket si një moment pozitiv optimist për Shqipërinë tani, mendoni se ky do të vazhdojë edhe në mars me hapjen e shumëpërfolur të negociatave?
Unë nuk do t’i bashkoja këto çështje, janë dy gjëra të ndara. Sot Shqipërisë i duhej ndihmë dhe ne e ndihmuam. Sa i përket procesit të zgjerimit, Shqipëria ka dhënë rezultate dhe ne jemi duke punuar me ata, por edhe me vendet e BE që të jemi të gatshëm ‘ti hapim negociatat e anëtarësimit. Por këto janë dy gjëra të ndryshme që nuk duhen përzier.
Por ju vetë a jeni optimist?
Unë jam optimist, por i matur, kemi shumë punë përpara nesh dhe është shumë herët për të thënë diçka. Por çfarë mund të them është, se ne në Komisionin Europian jemi shumë të përkushtuar për të arritur këtë, Shqipëria po ashtu është gjithashtu shumë e angazhuar të arrijë rezultate. Unë kuptoj sinjale pozitive nga vendet anëtare, por sërish e them, ne duhet të punojmë shumë dhe fort!
Kujtojmë këtu se Varhelyi ishte vetë i pranishëm pak muaj më parë në Shqipëri, ku pa nga afër dëmet e shkaktuara nga tërmeti tragjik i 26 nëntorit.
