Banorët e lagjes “28 Nëntori” në Vlorë kanë jetuar një “makth” të vazhdueshëm për dy vjet, për shkak të sjelljeve të dhunshme të komshiut të tyre, 34-vjeçarit Marjus Murataj.
Ky individ, i kthyer nga Greqia, është akuzuar për kërcënime të vazhdueshme ndaj banorëve, duke përfshirë kërcënime me thikë dhe vënien e zjarrin në shtëpinë e tij, një veprim që shkaktoi edhe dëme të tjera në banesat përreth.
Banorët kanë pohuar se ai shpesh ka shfaqur sjellje të çrregullta, siç është therja e kafshëve në ballkon dhe hedhja e mbetjeve në ambientet e përbashkëta.
Një ngjarje e rëndë ndodhi një vit më parë, kur Marjusi vendosi të vërë zjarrin në shtëpinë e tij dhe u ul poshtë për ta shikuar shtëpinë dhe banesat e tjera duke u djegur.
Kjo shkaktoi shqetësim të madh tek banorët, të cilët e konsiderojnë atë një rrezik për sigurinë e lagjes. Po ashtu, ai u akuzua për kërcënime ndaj një komshiu me thikë, ngjarje që u kap nga Policia e Vlorës.
Fiks Fare ka siguruar pamje të ngjarjes, ku Marjusi shfaqet duke vënë zjarr në shtëpinë e tij, ndërsa banesa e tij ishte mbushur me plehra.
Ai është denoncuar në polici nga banorët, dhe deri tani ka pasur disa referime nga Policia e Vlorës në Prokurorinë e Vlorës për veprime të tij kriminale, duke përfshirë shkatërrimin e pronës me zjarr dhe kanosje. Megjithatë, deri tani nuk janë ndjekur procedurat gjyqësore për këto raste.
Në datën 1 nëntor 2024, pas shqetësimit të vazhdueshëm të banorëve, Policia e Vlorës e shoqëroi Marjusin në Spitalin Psikiatrik “Ali Mihali” për trajtim.
Sipas psikiatrit të spitalit, ai nuk vuan nga sëmundje mendore, por ka nevojë për trajtim toksikologjik për shkak të përdorimit të alkoolit dhe drogës.
Pavarësisht hetimeve të hapura nga Prokuroria, Marjusi ka përfituar disa herë nga amnistia dhe deri tani nuk ka dalë përpara gjykatës. Një rast i vetëm ka shkuar në gjykatë, për akuza vjedhjeje, ku vetë Marjusi ishte i dëmtuari.
Lagjja “28 Nëntori” vazhdon të jetojë në pasiguri, ndërsa autoritetet po vazhdojnë hetimet për këtë individ dhe sjelljet e tij të dhunshme.
