Rrjeti SafeJournalists i ka shkruar një letër Kryetares së Kuvendit të Shqipërisë për të shprehur shqetësimet e tyre lidhur me krijimin e Komisionit të Posaçëm për Dezinformimin. Në letër, ata e pranojnë rëndësinë e trajtimit të çështjes së dezinformimit dhe ndërhyrjes së huaj, por shprehin shqetësimin e tyre për mënyrën se si është formuar ky komision.
Organizata thotë se mungesa e një procesi konsultativ me palët e interesuara, mungesa e konsensusit nga opozita dhe miratimi i shpejtë i këtij komisioni ngre shqetësime për qëllimin dhe objektivat e tij. Ata gjithashtu shprehin nevojën për një qasje transparente, gjithëpërfshirëse, dhe efektive nga ana e këtij komisioni.
Rrjeti SafeJournalists thotë se mekanizmat ekzistues ligjorë tashmë ofrojnë mënyra për të adresuar çështjet që lidhen me dezinformimin, dhe themelimi i një entiteti të ri me pushtet të gjerë kërkon një deliberim të hollësishëm për të parandaluar shkeljen e lirisë së medias dhe shprehjes.
Ata i bëjnë thirrje Kuvendit të Shqipërisë dhe Komisionit të sapoformuar për të punuar me një qasje transparente dhe për të përfshirë aktorë të ndryshëm në veprimtarinë e tyre. Për ata është thelbësore që vendimet dhe strategjitë e komisionit të bazohen në kërkime rigoroze dhe të përfshijnë një gamë të ndryshme aktorësh për të ruajtur vlerat demokratike.
Gjithashtu, ata përmendin se në harmonizimin me standardet evropiane, fokusi i këtij komisioni duhet të jetë në respektimin e kuadrit ligjor shqiptar dhe në luftimin e dezinformimit pa cenuar lirinë e medias dhe shprehjes.
Në fund të letërs, ata shprehin gatishmërinë e tyre për një dialog konstruktiv dhe kontribut në arritjen e objektivave të përbashkëta.
Kujtojmë se rrjeti Safe journalist ka reaguar edhe disa herë për shkeljen e të drejtavetë gazetarëve apo cënimin e lirisë së shprehjes në vendin tonë. Vlen të përmendet rasti kur kryeministri Rama çoi për riedukim gazetarin Klevin Muka, sepse nuk i pëlqeu pyetja që e vuri me shpatulla pas murit. I njejtë ishte dhe rasti ku SafeJournalist kërkoi të ndalej fushata e shpifjeve për Ola Xamën nga mediat e Veliajt.
