Ministrja e Shëndetësisë, Ogerta Manstirliu ka bërë me dije se deri në fund të këtij viti pritet të vijnë në Shqipëri më shumë se 500 mijë doza të vaksinës antiCovid, në sajë të bashkëpunimit me Pfizer. Në mbledhjen e Komisionit të Shëndetësisë, Manastirliu tha se pritet të mbërrijnë edhe rreth 400 mijë vaksina nga program i COVAX.
“Kjo marrëveshje do të rrisë furnizimin me vaksina. Një marrëveshje që realizohet në sajë të bashkëpunimit me Pfizer, pas marrëveshjes së parë ku erdhën 500 mijë vaksina. Vjen ky amendim për 500,760 doza vaksine të cilat priten të levrohen brenda muajti dhjetor të këtij viti. Ndërkohë përmes instrumentit Covax deri në fund të vitit presim edhe rreth 400 mijë doza vaksine që pritet të mbërrijnë në Shqipëri”, ka thënë Manastirliu.
Ministrja bëri me dije se po negociohet me Pfizer për të siguruar vaksina edhe për vitin tjetër për të rritur mbulesën vaksinale e për t’iu përgjigjur çdo skenari.
“Ne jemi në negociata me Pfizer për nënshkrimin e marrëveshjeve për të siguruar vaksina për vitin tjetër dhe në vazhdim për të rritur mbulesën vaksinale dhe për t’iu përgjigjur çdo skenari që Komitetet tona do të vendosin për të siguruar vaksinimin e popullatës” tha Manastirliu.
Ajo bëri me dije edhe shifrat e vaksinimit në vend, duke thënë se rreth 44% e popullsisë target, mbi 18 vjeç, janë vaksinuar. Në total janë kryer 1,764,714 doza të vaksinës. Me dy doza janë vaksinuar 811,765 qytetarë dhe 952,949 kanë marrë vetëm një dozë.
