Kreu i Grupit Parlamentar të Partisë Demokratike, Gazment Bardhi, ka njoftuar se nuk do të votojnë pro propozimit për krijimin e një komisioni të posaçëm anti-korrupsion. Bardhi argumenton se nuk ka pasur konsultime të mjaftueshme nga ana e Partisë Socialiste dhe se propozimi është bërë pa transparencë.
“PS-ja ka vepruar në mënyrë të njëanshme për ngritjen e këtij komisioni, pa na konsultuar dhe pa na informuar për objektin e punës së tij. Kjo qeveri është një nga më të korruptuarat në historinë e Shqipërisë, të rajonit dhe të Europës,” tha Bardhi pas mbledhjes së grupit parlamentar.
Ai shtoi se ky komision, i cili do të përbëhet nga 11 anëtarë, ku 6 prej tyre janë deputetë të Partisë Socialiste dhe 5 nga opozita, nuk ofron garanci për luftën serioze kundër korrupsionit. “Pa zgjedhje të lira dhe të ndershme, nuk mund të luftojmë korrupsionin në mënyrë efektive. Nëse qeveria është e seriozë për këtë çështje, duhet të fillojë me luftën kundër korrupsionit zgjedhor,” nënvizoi Bardhi, duke theksuar mungesën e seriozitetit në qasjen e qeverisë ndaj kësaj çështjeje.
