Komisioni i Medias ka rrëzuar ditën e sotme një tjetër dekret të presidentit, Ilir Meta.
Bëhet fjalë për rishikimin e ligjit mbi Akademinë e Shkencave, shkruan “Faxweb”.
E vetmja që votoi pro dekretit të Metës, ishte kryetarja e komisionit, Fatjona Dhimitri, e cila edhe më parë ka mbështetur nismën e akademikut, Artan Fuga, për reformimin e Akademisë.
Megjithatë, vota e saj ishte e pamjaftueshme, pas shumica e rrëzoi.
Presidenti dekretin për reformimin e Akademisë së Shkencave, e argumentoi duke thënë se ligji aktual cënon autonominë e institucioneve të arsimit të lartë, si dhe kompetencat e presidentit.
Sipas presidentit, me këto ndryshime, Akademia e Shkencave kthehet në institucionin e vetëm për gjuhën shqipe dhe për këtë aryse procesi vendimmarrës, duhet të përfshijë edhe katedrat e fakulteteve të gjuhës, shkencave sociale dhe gazetarisë.
Një tjetër shqetësim i Metës ishte edhe për ndryshimet në marrjen e statusit të anëtarit të jashtëm, ku pranimi i kandidatëve kryehet individualisht dhe jo në grup.
Kujtojmë këtu se javën e shkuar u rrëzuan dekretet e Metës për koncesionet dhe privatizimet.
