Kreu i grupit parlamentar të Partisë Socialiste, Taulant Balla ka thënë se javën e ardhshme mbledhjet e Komisioneve Parlamentare mund të kthehen fizikisht. Balla ka thënë se jo të gjithë deputetët i kanë kryer të dyja dozat e vaksinës.
Balla i ka bërë thirrje Partisë Demokratike që të kryejnë të dyja dozat e vaksinës dhe javën tjetër konferenca e kryetarëve do të japë dritën jeshile që pjesëmarrja të jetë fizikisht. Deputeti socialist tha se teoria që maxhoranca ka frikë nga debatet, duhet lënë pas.
“Ju them me përgjegjësi që kam ushtruar aktivitetin tim dhe kërkesën legjitime dhe pjesa më e madhe deputetëve kanë kryer të dy dozat, ata që nuk i kanë kryer janë akoma brenda afateve. Me PD për këtë cështje ka pasur dakortësi që mbledhjet të zhvillohen duke respektuar distancën dhe të gjitha rregullat e tjera minimale. Koha e fituar kete javë ishte sepse axhenda parlamentare ishte e tillë që të kërkonte mirëkuptim nga ana e PD, unë e kuptoj që hallet brenda në shtëpi i bën që të krijojnë probleme të panevojshme. Komisonet online janë një praktikë qe do vijojë, seancat dëgjimore apo cështje qe kërkojnë debat të zgjeruar.
Për ta konkluduar do u bëja thirrje shpirtrave të trazuar në PD, që kjo cështje është mëse e qartë dhe të kryejnë detyrimin qe ka cdo qytetar për vaksinim më dy doza dhe për javën tjetër konferenca e kryetarëve do japë dritën jeshile dhe pjesëmarrja do jetë padyshim me këto masa.
Nuk kam pasur kontakt me kolegë të PD por kemi rënë dakort që pjesëmarrja do të jetë e tillë, përjashtuar rastet e veçanta që zotëron udhëzim nga mjeku. Komisionet mund të rikthehen javen e ardhshme. Ajo teoria qe ne kemi frikë nga debati janë histori që duhen lënë mbrapa me detyrat që ka parlamenti me monitorimin e shumë cështjeve”, ka thënë Balla.
