Trajnieri i Kombëtares, Sylvinho në një konferencë live për mediat ka folur lidhur me listën e lojtarëve kuqezi për dy sfidat e fundit kundër Moldavisë dhe Ishujve Faroe.
Ai analizoi këto dy ndeshje duke treguar se Kombëtarja ka nevojë për sulmues anësorë, për këtë arsye është thirrur futbollisti Muçolli.
“Kemi dy finale shumë të rëndësishme. Në këto fushatë kemi thirrur 40 lojtarë. Për herë të parë, me mua, kemi marrë Muçollin. Çuni? Kemi dy pyka si Cikalleshi dhe Daku, por dhe lojtarë të tjerë që mund të bëjnë atë rol, si Uzuni apo Seferi. Në këto ndeshje ne kemi nevojë për sulmues anësorë, për këtë arsye kemi thirrur Muçollin. Kemi përpara dy ndeshje të rëndësishme që vendosin fatin e kualifikimit për në Evropian. Luajmë ndaj dy rivalëve që janë shumë të fortë në mbrojte, Moldavia është një kundërshtar që nuk ka pësuar asnjë humbje në shtëpi”, u shpreh trajnieri.
Ai u pyet edhe për mungesën e Armando Brojës në këto dy ndeshje. Sylvinho u shpreh se ai u largua në Londër për shkak të dëmtimit që ka pësuar dhe i duhej kohë që të rikuperohej.
“Broja u rikthye në Londër për shkak të shqetësimit që pati, një lojtar që u dëmtuar 11 muaj më parë, ka nevojë për kohën e tij që të rikthehet dhe ai ende nuk është rikthyer si duhet. Çelsi ka zhvilluar katër ndeshje deri më tani dhe ai nuk ka luajtur në asnjërën prej tyre pasi ka nevojë për kohë. Eshtë normale kjo situatë, ai duhet të marrë kohën e tij. Ne duhet të presim dhe të respektojmë shëndetin e tij, si lojtar ai është i jashtëzakonshëm”, u shpreh ai.
