Kolegji Zgjedhor ka konfirmuar rezultatin zgjedhor për qarqet Lezhë dhe Gjirokastër, duke lënë në fuqi vendimin e mëparshëm të Komisionit të Ankimimeve dhe Sanksioneve.
Me këtë vendim, të dy qarqet bëhen të parat ku procesi i 11 majit është zyrtarisht i certifikuar.
Në Lezhë, sipas rezultatit përfundimtar, Partia Demokratike ka siguruar 4 mandate, ndërsa Partia Socialiste 3. Në Gjirokastër, kryeson PS me shumicën e mandateve.
PD kishte paraqitur një kërkesë për anulimin e rezultatit në Lezhë, duke pretenduar për manipulime dhe parregullsi, përfshirë edhe keqpërdorimin e votave të Diasporës.
Por Komisioni Qendror i Zgjedhjeve e rrëzoi ankimimin, duke e cilësuar të pabazuar.
Megjithatë, opozita nuk e ka mbyllur betejën ligjore. Kolegji Zgjedhor pritet të shqyrtojë në ditët në vijim edhe ankesat e PD-së për qarqet Gjirokastër, Korçë dhe Kukës.
Për këto zona, PD kërkon jo vetëm pavlefshmëri të pjesshme të rezultatit, por edhe përsëritje të zgjedhjeve.
