Akuza tepër të forta ka bërë Evi Kokalari në adresë të Lulzim Bashës ditën e sotme, teksa fliste në krah të Sali Berishës në takimin me demokratët e Durrësit.
Ajo deklaroi se kreut të PD-së i është hequr viza amerikane 2-3 vite dhe se këtë do të shkojë ta verifikojë vetë në Amerikë.
Sipas Kokalarit, Lulzim Basha i ka bërë gropën vetes me vendimin për të përjashtuar Berishën, vendim ky që sipas saj është marrë përshkak të dosjes që Lulzim Basha ka në Amerikë.
Kokalari e akuzon Bashën se ka lobuar në Amerikë me një shumë prej 750 mijë dollarësh të cilat janë paguar nga një kompani ruse.
“Lulzim Basha e ka përjashtuar Berishën për shkak të dosjes që ka në Amerikë dhe jo për korrupsion. Disa mendojnë se po i rri zotit Berisha për tu bërë kryetare e PD-së, por duhet shumë mund që të më sillni mua në Shqipëri. Nuk ka nevojë të më bëni mua kryetare të PD-së pasi ne e kemi kryetarin e Partisë Demokratike, ai është zoti Sali Berisha. Unë dua të flas pak për dosjen e Lulzim Bashës që ka ekzistuar në Amerikë. Këtu është pika ku Lulzim Basha u ngatërrua me veten sepse nuk kishte pse të fshihnte fondet që sillte për të lobuar. Brenda 3-4 muaj PD ka paguar 750 mijë dollarë për të lobuar në Amerikë. Një kompani ruse bëri kontratë me një kompani në Amerikë sikur po investoheshin para nga Shqipëria. Lulzim Bashës iu hoq e drejta e vizës për dy-tre vjet. Më pas kjo dosje u mbyll me kushtin që të hiqej Berisha nga grupi parlamentar i PD-së. unë do shkoj në Amerikë dhe do të kontrolloj nëse Basha mund të futet në SHBA dhe të marrë vizë, kështu ne do e bëjmë problem dhe do e çojmë në Kongres. Me pak fjalë Lulzim Basha nuk mundi të shpëtojë veten por i hapi gropën vetes“, tha Kokalari.
