SPAK ka dërguar letërporosi në Republikën Domenikane për të thelluar hetimet mbi trafikun ndërkombëtar të kokainës, e fshehur në lëkurat e kafshëve.
Dyshohet se ky aktivitet kriminal përfshin persona rezidentë në Amerikën Latine, të cilët janë pjesë e një grupi të mirëorganizuar.
Sipas autoriteteve, analizat laboratorike kanë konfirmuar praninë e kokainës në lëkurat e kafshëve që kanë mbërritur nga Republika Domenikane në Shqipëri.
Kjo substancë ishte menduar të nxirrej nga anëtarët e grupit kriminal me qëllim trafikimin e saj në tregjet e ndryshme. Aktualisht, hetuesit nuk kanë përfunduar analizat e ADN-së dhe identifikimin e gjurmëve të gishtave, të zbuluara në laboratorin e Qerrekut në Fushë Krujë dhe dy bazat e tjera në zonën e Kodrës së Diellit dhe Durrës.
Për më tepër, ekspertët kimistë janë duke u përgatitur për të kryer procesin e nxjerrjes së kokainës nga lëkurat, si dhe për të përcaktuar sasinë e saktë të lëndës narkotike.
Ndërkohë, hetuesit kanë marrë në pyetje të arrestuarit, të cilët kanë mohuar përfshirjen në këtë aktivitet kriminal.
Letërporositë dërguar Republikës Domenikane synojnë identifikimin e bashkëpunëtorëve dhe zbardhjen e rrjetit ndërkombëtar të trafikut.
