Masa e sigurisë “arrest me burg” është vendosur për Bajron Gumenin, menaxher i kompanisë “Alba Exotic Fruit”, në kontejnerët e së cilës në Portin e Durrësit u gjet brenda pak ditësh tre herë kokainë. Gjykata e Posaçme e Apelit për Korrupsionin dhe Krimin e Organizuar ka marrë vendimin ditën e sotme, ndërsa dosja tashmë i ka kaluar Prokurorisë së Posaçme Kundër Korrupsionit dhe Krimit të Organizuar. Hetimet fillimisht u kryen nga Prokuroria e Durrësit, pasi ka dyshime se se trafiku i drogës mund të jetë kryer në llogari të një grupi të strukturuar kriminal.
Gumeni u arrestua në datën 15 korrik, pasi në kontejnerët e “Alba Exotic Fruit” u gjetën dhe u sekuestruan fillimisht 11 kg kokainë. Përmes avokatit Elton Hysnei, Gumeni i ka kundërshtuar akuzat dhe ka kërkuar që dosja të rikthehet sërish për hetim në Prokurorinë e Durrësit.
Në kuadër të operacionit të koduar “Rada”, në kontenjerët e firmës u gjetën dhe u sekuestruan tre herë lëndë narkotike kokainë. Në fillim u gjet një sasi prej 11 kg, herën e dytë u gjetën rreth 6.5 kilogramë kokainë, dhe në datën 29 korrik u sekuestrua edhe sasia e tretë prej 7.25 kilogramësh. Në kërkim është shpallur edhe administratori i kompanisë “Alba Exotic Fruit”, Eduart Dauti.
