Në Shqipëri ka qenë e vështirë që në këtë kohë të zymtë pandemie të gjenerohen para, sidomos të ardhura nga jashtë, pasi e gjithë bota ishte e bllokuar.
Por edhe pse në xhepat e shqiptarëve vështirë se ka hyrë diçka, për të dalë kanë dalë tepër, dhe madje edhe jashtë vendit kanë ikur miliona euro.
Kanë qenë kompanitë e huaja në vend, ose ato me aksionerë të huaj, që kanë bërë “namin” me transferime të parave jashtë vendit, pothuajse në nivelet e para-pandemisë.
Sipas të dhënave të Bankës së Shqipërisë, transferimi i fitimeve nga investitorët e huaj, rezultoi në nivele të larta edhe në 3-mujorin e dytë të vitit, pavarësisht efekteve të pandemisë.
Të dhënat, tregojnë se, flukset dalëse në zërin e të ardhurave nga investimet (kryesisht transferimi i fitimit), për 3-mujorin e dytë të vitit, ishin 136 milionë euro, ose vetëm 7 (shtatë) milionë euro më pak, krahasuar me të njëjtën periudhë të vitit të kaluar.
Për gjysmën e parë të vitit, flukset dalëse të lidhura me të ardhurat nga investimet arritën në 258 milionë euro, me një rënie prej 3.4%, krahasuar me një vit më parë.
Të parat në listë për nxjerrjen e fitimeve jashtë vendit ishin sërish kompanitë celulare, ku tre opratorët duke pasur edhe aksionerë të huaj, çdo vit kryejnë këtë operacion financiar, duke hequr sasi të konsiderueshme parash nga tregu ynë.
Për bizneset që operojnë në tregjet e mbikëqyrura financiare nga AMF-ja, si bankat apo kompanitë e sigurimeve, shpërndarja e fitimeve u pezullua përmes vendimeve të posaçme të autoriteteve rregullatore për të gjithë vitin 2020.
Në sektorët e tjerë të ekonomisë, po të shohim shifrat, duket se shpërndarja e fitimeve ka vijuar.
Me gjithë rënien e lehtë nga viti i kaluar, fitimet nga investimet e dala jashtë vendit janë sërish pranë niveleve më të larta në 12 vitet e fundit.
Pas vitit 2017, vërehet një rritje e transferimit të fitimeve, çka e ka thelluar efektin negativ që zëri i të ardhurave nga investimet jep në bilancin e llogarisë korrente.
Për 6-mujorin 2020, bilanci neto i të ardhurave nga investimet ishte negative në vlerën e 207 milionë eurove, ndërsa një vit më parë kishte qenë 221 milionë euro.
Ky zë historikisht ka qenë negativ për Shqipërinë, për shkak se ne jemi një vend kryesisht pritës i investimeve të huaja.
Kjo sjell edhe dalje periodike të të ardhurave në formën e dividendëve, që shoqëritë me kapital të huaj shpërndajnë te aksionerët e tyre jashtë vendit.
Të ardhurat e ekonomisë shqiptare nga investimet jashtë vendit janë ndjeshëm më të ulëta dhe për gjysmën e parë të këtij viti ato përbënin më pak se 20% të fitimeve të dala jashtë. Kjo nënkupton se, për çdo pesë euro të transferuara jashtë në formë fitimesh, ekonomia jonë arrin të marrë vetëm një euro në kahun e kundërt, atë të të ardhurave.
Pandemia e Covid-19 solli një goditje të fortë në ekonomi dhe pasiguri të shtuar për të ardhmen. Mendohej se një situatë e tillë do të sillte një pezullim më masiv të shpërndarjes së fitimeve nga shoqëritë e huaja.
Një faktor tjetër që ka ndikuar daljet e larta të fitimeve në vitet e fundit është rritja e detyrimeve te jorezidentët, sidomos nga qeveria shqiptare.
Vitin e kaluar, qeveria shqiptare shpenzoi 12.3 miliardë lekë për të paguar interesat e borxhit të jashtëm, ndërsa në gjysmën e parë të këtij pagesat e interesave për kreditorët jo-rezidentë arritën në 4.2 miliardë lekë.
/Burimi: Monitor.al/ Përshtati: GazetaReforma.com/
