Pas lajmit se kryeminstri Edi Rama caktoi si drejtues politik të Partisë Socialiste në Kukës, kryebashkiaku i këtij qytetit Safet Gjici tha se deputetja aktuale e këtij qarku Mimi Kodheli, nuk ka qenë asnjëherë në këtë qytet për hallet e qytetarëve.
“Ajo ka problemet e veta nuk ka lidhje me punën time. PS e solli si kryesuese e deputetëve të listës për qarkun e Kukësit, e mbështetëm dhe sot ka mandatin, por nuk kemi sistem tjetër zgjedhor, dhe kandidatët me më shumë vota përfaqësohen në parlament, nëse do ndiqnim këtë model mandatin do ta kisha unë jo Kodheli. Ajo s’ka qenë asnjëherë këtu për hallet e Kukësit”, tha Gjici në një intervistë për FaxNews.
Por një deklaratë e tillë ngjalli shumë polemika në media dhe reagimi i Gjicit erdhi menjëherë në rrjetin social në Facebook. Me sa duket Gjici ka reflektuar dhe ka menduar të tërhiqet duke bërë edhe një sqarim për ndjekësit e tij dhe jo vetëm.
Gjici shkruan se deklarata e tij është keqkuptuar dhe se ai ka pasur marrëdhënie të shkëlqyera me Kodhelin dhe Ilir Beqajn.
Reagimi i Gjicit
“Të nderuar miq dua të bëj një reagim të detyruar në lidhje me keqinterpretimin që i është bërë deklaratës sime sot në media.
Unë kam patur dhe vazhdoj që të kem marrëdhënie dhe bashkëpunim të shkëlqyer me ish të deleguarin politik të qarkut Kukës z. Ilir Beqja dhe deputeten znj. Mimi Kodheli ku kemi bërë shumë punë së bashku
Në familjen tonë politike të gjithë jemi për një qëllim,fitoren e Partisë Socialiste.”, shkruan Gjici.
