Kontrolli i Lartë i Shtetit ka zbuluar një sërë shkeljesh të rënda në procedurat e prokurimit të ndjekura nga Bashkia Sarandë, për periudhën 2022–2023.
Auditimi përfshiu 12 tenderë me një fond total prej afro 280 milionë lekësh dhe konstatoi mangësi të theksuara që prekin zbatimin e ligjit, transparencën dhe përdorimin e drejtë të fondeve publike.
Raporti evidenton parregullsi në përgatitjen e dokumentacionit teknik, përzgjedhjen e operatorëve dhe në menaxhimin e kontratave. Në disa raste janë bërë pagesa për punime të pakryera ose për periudha kur kontratat nuk kishin hyrë ende në fuqi.
Në tenderin për pastrimin e qytetit, janë përfshirë dy herë shpenzime të njëjta, ndërsa operatori ka përfituar rreth 1 milion lekë për larje dhe dezinfektim para nënshkrimit të kontratës.
Po ashtu, për tenderin e rikualifikimit të rrugëve në lagjen Gjashtë, Bashkia kishte kërkuar saldator në staf, ndonëse në projekt nuk kishte punime që kërkonin saldim.
Në procedurën për furnizimin me ujë në zonën “Baba Rexhepi” dhe “Lugu i Dardhës”, mungonte dokumentacioni teknik për garanci dhe kolaudim, duke sjellë një dëm ekonomik mbi 1.8 milion lekë.
Në projektet për rrugët e fshatrave Metoq, Berdenesh, Çukë e Manastir, pagesat e kryera për punime të pakryera arrijnë në mbi 1.2 milion lekë.
Një tjetër rast problematik ishte rikonstruksioni i shkollës “Adem Sheme”, ku punimet rezultuan të papërfunduara, por pagesat ishin bërë mbi situacione të rreme, duke shkaktuar një dëm financiar prej mbi 4.6 milion lekësh.
Ndërkohë, në tenderin për rrjetin rrugor të Ksamilit, Bashkia skualifikoi në mënyrë të pabazuar ofertuesin që kishte çmimin më të ulët, duke i shkaktuar buxhetit një humbje prej mbi 1.5 milion lekësh.
