Këshilli i Lartë i Prokurorisë (KLP), ka zhvilluar mesditën e sotme një mbledhje, në të cilën u shqyrtuan disa çështje të rëndësishme.
Pasi dëgjoi relacionet e Komisionit të Zhvillimit të Karrierës, Këshilli vendosi miratimin e projekt-akteve “Për caktimin e përkohshëm në pozicionin e Drejtuesit të Prokurorisë pranë Gjykatës së Shkallës së Parë Lushnje të Arben Dyla ”, “Për caktimin e përkohshëm në pozicionin e Drejtuesit të Prokurorisë pranë Gjykatës së Shkallës së Parë Fier të znj. Violeta Shkurta ” dhe “Për caktimin e përkohshëm në pozicionin e prokurorit të Prokurorisë pranë Gjykatës së Apelit Tiranë të znj. Arta Marku”.
Këshilli ndër të tjera gjatë mbledhjes pasi verifikoi kushtet dhe kriteret ligjore të emërimit, pasurisë, figurës dhe integritetit, vendosën emërimin e të dy kandidatëve për magjistratë në profilin prokuror, Gazmend Frëngun dhe Enkeleda Hoxhën, pas diplomimit në Shkollën e Magjistraturës në vitin akademik 2019-2020.
Me caktimin e këtyre emërimeve, Këshilli i hapi rrugën shpalljes së dy vendeve vakante të kandidaturave për prokurorë.
Kujtojmë se mbledhja është organizuar on-line në lidhje me platformën Zoom me të gjithë anëtarët e Këshillit, si dhe të ftuar përfaqësues nga Ministria e Drejtësisë, programet EURALIUS dhe OPDAT, në kushtet e distancimit social si rezultat i pandemisë COVID-19.
Gjithashtu Këshilli i Lartë Prokurorial, miratoi me shumicë votash, raportet raportet për analizimin e aftësisë profesionale të subjektit të rivlerësimit Ervin Beqiri, Petrit Hysa dhe Lindita Male (Ziguri) dhe projekt-aktin për mbarimin e statusit, për shkak dorëheqje, të magjistratit znj. Rabiana Halili, aktualisht prokurore në Prokurorinë pranë Gjykatës së Shkallës së Parë Durrës.
