Ish-deputeti i Partisë Demokratike, Klevis Balliu në një reagim publik pas humbjeve të zgjedhjeve të 25 prillit. Balliu është shprehur se ky nuk është fundi, duke folur për një vazhdim epik të luftës opozitare dhe rezistencës. Balliu ka thënë se detyra nuk është e thjeshtë, por fitorja thotë ai nuk është e pamundur. Ai gjithashtu ka theksuar se me aspekte të reja dhe të thella taktike dhe strategjike do të mund ta shembim diktaturën.
Deklarata e plotë
Të dashur miq demokratë.
Sot është dita për një falënderim për të gjithë ju.
Jemi përplasur egërsisht me modelin më të zi të një diktature të pashpallur në letra por katastrofike në veprim.
Ky nuk është fundi. Jemi përpara një vazhdimi epik të luftës opozitare të një rezistence të vendosur dhe tradicionale për NE në shembjen e figurës më të zezë pas Enver Hoxhës gjatë gjithë këtyre viteve në demokraci.
Detyra nuk është e thjeshtë, por fitorja jo vetëm që nuk është e pamundur por duke e pasuruar luftën tonë me aspekte të reja dhe të thella taktike dhe strategjike, ne do ta shembin diktatorin.
Natyrisht nga besimi dhe fjalët tek vepra dhe aksioni politik është një distancë që ne do ta përballojmë me heroizëm real.
Në pikëpyetje nuk është fati ynë por ai i fëmijëve tanë, fati i demokracisë dhe mbi të gjitha fati i kombit tonë.
