Babai i 26-vjeçarit Indrit Çelaj, ka reaguar pas vrasjes së të birit me një plumb në kokë, teksa po punonte për montimin e një kondicioneri në vilën e familjes Kusi.
Baftjar Çelaj, shprehet se ka marrë vesh lajmin përmes mediave, ndërsa ka thënë se djali i tij nuk ka pasur asnjë konflikt. Mësohet se Indriti ka qenë djalë i vetëm, mes tre motrave.
Babai i 26-vjeçarit është shprehur i tronditur për ngjarjen duke thënë se kjo që i ka ndodhur këtij të mos i ndodhë asnjë njeriu. Lajmin për të birin e ka marrë vesh në orën 7 të mbrëmjes, ndërkohë që ngjarja ka ndodhur në 11, në mesditë.
“Djali ishte në punë punonte me kondicionerë dhe i montonte ka mbaruar elektrikën. Kjo që më ndodhi mua mos i ndodhtë asnjërit! Ti nisesh në punë dhe kthehesh i vdekur.
Djali është vrarë në orën 11:00, unë e mora vesh në orën 19:00. Lajmin e mora vesh nga mediat. I kishin marrë edhe dokumentet, çunin e kishte marrë policia. Asnjë konftikt nuk ka pasur djali, ka qenë i kulturuar dhe i sjellshëm. Rrallë gjen djalë si ai. Nuk dinte të ofendonte, ishte i matur.
Ma morën djalin në moshë të re. Kur vajta në spital vetëm kam mbajtur frymën dhe veten. Sikur të kisha fuqi nuk dija se cfarë mund të bëja. Ku do kërkoj drejtësi, kush ma zgjidh mua”, është shprehur i përlotur babai i 26-vjeçarit që ndërroi jetë sot në Spitalin e Traumës pas ngjarjes së djeshme.
Policia njoftoi se Griseldo Kusi, 31 vjeç, në bashkëpunim me vëllain e tij, Albano Kusi 28 vjeç, pas një konflikti të çastit me Indrit Çelajn, dyshohet se ka qëlluar me plumb në kokë 26-vjeçarin, i cili ndërroi jetë mëngjesin e sotëm.
