Në Durrës po vijon operacioni, për shpëtimin e personave që kanë mbetur nën rrënoja nga tërmeti.
Deri më tani raportohet për 15 viktima, 43 të shpëtuar dhe 600 të plagosur.
Gjithashtu në qytetin bregdetar janë rrafshuar dy hotele, si dhe janë shembur disa ndërtesa, ku ra në sy fundosja e dy kateve të pallatit në Durrës.
Ndërkohë mësohet se një 23-vjeçar është nxjerrë i gjallë nga rrënojat e hotelit “Mira Mare”.
Ky i fundit punonte kamerier në hotel.
Ai u tha forcave të shpëtimit, se kishte pasur dy të vdekur nën këmbët e tij.
I riu është shprehur se daja i tij po lufton për jetën, pasi është me fytyrë nga betoni.
