Presidenti i SHBA-së, Donald Trump, ka reaguar ndaj veprimit të Kinës për të rritur ndjeshëm tarifat mbi importet amerikane, duke i bërë thirrje kompanive që të transferojnë aktivitetet e tyre në Shtetet e Bashkuara.
Në një postim në platformën Truth Social, Trump shkruante:
“Kjo është një mundësi e shkëlqyer për të zhvendosur kompaninë tuaj në SHBA. Zero tarifa, mos prit, bëje tani!”
Reagimi i Trump vjen pas njoftimit të Ministrisë së Financave të Kinës për rritjen e tarifave për mallrat amerikane nga 34% në 84%, si kundërpërgjigje ndaj masave të administratës Trump, e cila kishte vendosur tarifa prej 104% për produktet kineze.
Ky ndryshim do të hyjë në fuqi më 10 prill dhe shënon një intensifikim të mëtejshëm të tensioneve tregtare mes dy ekonomive kryesore të botës.
