Autoritetet kineze dhe Organizata Botërore e Shëndetësisë (OBSH) kanë mohuar pretendimet mbi një “virus të ri” në Kinë, duke sqaruar se rritja e rasteve të metapneumovirusit njerëzor (HMPV) është normale për sezonin e dimrit dhe nuk përbën kërcënim të pazakontë.
Zëdhënësi i Ministrisë së Jashtme kineze, Guo Jiakun, deklaroi se HMPV është një virus i njohur prej më shumë se 60 vitesh dhe quajtja e tij si “virus i panjohur” krijon panik të panevojshëm.
Ai shtoi se niveli i infeksioneve të frymëmarrjes është më i ulët se vitin e kaluar dhe autoritetet po monitorojnë vazhdimisht situatën, duke dhënë udhëzime të bazuara në shkencë për qytetarët.
OBSH ka konfirmuar se HMPV është një patogjen i zakonshëm që zakonisht shkakton simptoma të lehta dhe se nivelet e raportuara janë brenda kufijve normalë për periudhën dimërore. Kina deklaron se është në kontakt të vazhdueshëm me OBSH për të ndarë informacion mbi situatën shëndetësore.
Ndërkohë, raportet e disa mediave të huaja për spitale të mbingarkuara në Kinë janë cilësuar si të ekzagjeruara. Guo Jiakun sqaroi se numri i shtrimeve në spitale është më i ulët se në të njëjtën periudhë të vitit të kaluar dhe se situata nuk ka kërkuar masa emergjente.
