Ditën e sotme është finalizuar operacioni i radhës për riatdhesimin e 104 shqiptarëve, që kanë shkelur rregullat e qëndrimit në BE, si dhe kanë kërkuar azil.
Gjatë mesditës, në Rinas mbërritën dy chartera të cilët ishin nisur nga Franca dhe Gjermania, bën me dije policia.
Në mesin e të deportuarve, 15 ishin nga Franca, 5 nga Belgjika dhe 84 nga Gjermania.
Policia gjithashtu u ka bërë thirre të gjithë shqiptarëve, që të respektojnë rregullat e lëvizjes në zonën Schengen, si dhe të mos bëjnë kërkesa për azil, pasi shanset për ta fituar janë 0.
Ndërkohë do të shtohen kontrollet në kufi, për parandalimin e azilkërkimit.
Njoftimi i policisë
Riatdhesohen 104 shtetas shqiptarë, të cilët kishin shkelur rregullat e qëndrimit në BE apo kishin kërkuar azil.
Një tjetër operacion riatdhesimi i shtetasve, që kanë kërkuar azil apo kanë shkelur rregullat e qëndrimit në hapësirën Schengen, është finalizuar ditën e sotme në bashkëpunim me Francën, Belgjikën dhe Gjermaninë.
Mesditën e sotme nëpërmjet dy charterave nga Franca dhe Gjermania, në kuadër të fluturimit të përbashkët evropian organizuar nga Franca, Belgjika dhe Gjermania në bashkëpunim me FRONTEX, si dhe me mbështetjen e eskortës shqiptare, u riatdhesuan 104 shtetas shqiptarë, nga të cilët: 15 shtetas nga Franca, 5 nga Belgjika dhe 84 nga Gjermania. Operacionet e riatdhesimit do vijojnë edhe në javët e ardhshme dhe në këtë kontekst, Policia e Shtetit apelon edhe një herë të gjithë shtetasit shqiptarë që udhëtojnë për në vendet e BE-së, të respektojnë rregullat e lëvizjes në hapësirën Schengen, si dhe të mos provojnë të kërkojnë azil, pasi shanset për ta fituar janë zero. Në pikat e kalimit kufitar, Policia Kufitare do vijojë të aplikojë masat shtesë të marra për parandalimin e azilkërkimit, duke vijuar me kontrollet rigoroze në drejtim të verifikimit të dokumentacionit dhe plotësimit të kushteve për të udhëtuar në vendet e BE-së, si dhe të kontrollit më të rreptë të kufirit jeshil.
