I cilësuari si i forti i Vlorës në trazirat e ’97 Zani Caushi do shkaktonte shumë polemika disa ditë më parë kur u raportia se ka kërkuar lirinë me kusht në Gjykatën e Korçës. Myrteza Çaushi, i njohur ndryshe si Zani Çaushi, i dënuar me burgim të përjetshëm ka bërë kërkesë për të përfituar lirinë. Ish-kreu i bandës së “Çoles” kërkon që Gjykata të ndryshojë vendimin e marrë ndaj tij.
Ditën e sotme ai doli para Gjykatës, mirëpo ka surprizuar sërish pasi është tërhequr nga kërkesa për lirim me kusht. I dënuari me burgim të përjetshëm duket se mëngjesin e sotëm ka ndryshuar mendim për kërkesën e bërë nga ai vetë për t’u liruar me kusht në mënyrë që të shkonte pranë fëmijëve të tij të mitur.
Sapo është përballur me togat e zeza në seancë gjyqësore, Çaushi ka deklaruar papritur se është tërhequr nga kjo kërkesë, duke bërë që gjykata të shkojë drejt pushimit të çështjes.
Ende nuk dihet se çfarë e ka bërë “kapobandon” e Vlorës që të ndryshojë mendim për lirinë e tij dhe vazhdojë të qëndrojë përjetë në burg. Dalja e tij sot nga burgu i Drenovës është “ndjerë” në të gjithë qytetin e Korçës, pasi Policia ka blinduar qytetin dhe të gjitha rrugët që të çonin në Gjykatë.
Çaushi ishte një nga emrat më të famshëm të bandave të Vlorës në vitin 1997, përgjegjës për shumë vrasje të kryera nga banda e tij si dhe grabitjesh e vjedhjesh. Më pas ai u arrestua dhe prej dënimit të atëhershëm ka qenë në burgje.
