Apeli i GJKKO-së ka rrëzuar kërkesën e Ajola Xoxës, duke lënë në fuqi vendimin e shkallës së parë për sekuestrimin e celularit të saj.
Bashkëshortja e kryebashkiakut të Tiranës, Erion Veliaj, është subjekt i një hetimi të zgjeruar nga SPAK, në kuadër të dosjes që ka në fokus abuzimet me fondet publike të Bashkisë Tiranë.
Me vendim të datës 6 dhjetor 2024, SPAK kishte marrë autorizimin për të ushtruar kontroll mbi telefonin e Xoxës, në funksion të provave që lidhen me veprimtarinë e saj të dyshuar kriminale.
Hetuesit e Prokurorisë së Posaçme pretendojnë se Veliaj dhe Xoxa kanë ngritur një skemë të mirëorganizuar, përmes së cilës janë siguruar përfitime të paligjshme nga fondet publike, të cilat më pas janë përdorur për pasurim personal dhe familjar.
Ajola Xoxa akuzohet për disa vepra penale të rënda, përfshirë “korrupsion pasiv i funksionarëve të lartë shtetërorë ose të zgjedhurve vendorë”, kryer në bashkëpunim në 9 raste, “pastrim parash” dhe “fshehje pasurie”.
Fillimisht ndaj saj u vendos masa e sigurisë “arrest shtëpie”, por më pas u zbut në “detyrim paraqitje”, pas vlerësimit të masës nga Gjykata e Posaçme.
SPAK ka paralajmëruar se hetimet janë ende në vijim, dhe priten zhvillime të tjera lidhur me përmasat e kësaj skeme që dyshohet të jetë drejtuar nga nivelet më të larta të administratës vendore në Tiranë.
